本期內容簡介

編輯个話

行入13 年个《文學客家》，第60 期編輯完稿，詩文成果承蒙各界支持，這期用「客家妹仔轉妹家」做專題，來同大家分享轉妹家个各種各樣情景！
轉妹家就係「轉外家」，「回娘家」个意義，客家口語會講做「掌妹家」。後生時代个客家妹仔，帶等婿郎、細人仔共下轉妹家，爺哀還在个年節，該係盡幸福个時光，一代傳一代，客家妹仔降出妹仔來，自家兩公婆變做妹仔轉妹家个對象，形成「娘家」、「婆家」情緣个雙層關聯，這期「客家妹仔轉妹家」个專題，承蒙徐儀錦、余惠蓮，左春香、廖惠貞、李秀琴、邱春英、郭如育寫出轉妹家个世代傳承，融合親情同愛情，讀起來實在盡有意思！
這期〈有影有跡〉單元，係「文學客家讀書會同2025 台北國際書展」个報導文稿。〈小說欣賞〉單元，刊出張捷明先生个作品摎左春香先生个評論文章，客語文學同台灣精神个傳揚，還愛大家煞猛延續下去！
承蒙邱湘雲、黃有富、胡明華、王興寶、哈可星提供新詩作品，徐貴榮、溫筆明、葉玉嬌、彭欽清先生个散文作品；還有「故事」1 篇，曾鳳嬌先生講古，值得慢慢來欣賞。
承蒙大家來稿相添，𢯭手開展客語書寫个元氣！